Депутат күні: елорда халқына жедел медициналық жәрдем берудің проблемалық мәселелері

Қалалық мәслихатта «Елорда халқына жедел медициналық жәрдем берудің проблемалық мәселелері. Көлікпен қамтамасыз ету, жетудің уақтылығы» тақырыбына Депутат күні өтті. 

Қоғамдық денсаулық сақтау басқармасының басшысы Алия Рүстемова депутаттарға 2025 жылдың алты айында жедел медициналық жәрдем қызметі қала тұрғындарына 315 933 шақыртуға қызмет көрсеткенін, бұл өтініштердің жалпы санының 66,9 %-ын құрайтынын хабарлады. Ол өз сөзінде Мемлекет басшысының Қазақстан халқына Жолдауында айтылған мына жайтты атап өтті: «Елордада халық саны ресми түрде 1,5 миллион адам болғанымен, оның инфрақұрылымы іс жүзінде күн сайын 1,9 миллион адамға қызмет көрсетеді.

Басқаша айтсақ, Астана 400 мыңнан астам адамға, яғни халық саны бойынша орташа қала саналатын тағы бір шаһардың тұрғындарына пара-пар жұртқа ешқандай жоба-жоспарсыз қызмет етіп жатыр».

Биылғы жылы былтырғы осы кезеңмен салыстырғанда жедел жәрдемнің шығу бригадалары 30 бірлікке артып, 70-тен 100 бригадаға дейін жетті. Бұдан бөлек, емханалық бригадалардың да саны артты. Санитарлық көліктің  194 бірлігі бар, оның ішінде 127-сі (65,5%) ғана қолданыста. Санитарлық көліктердің жалпы тозу деңгейі 67%-ды құрайды, ал 13 санитарлық көлік есептен шығаруға жатады. Проблемалық мәселелердің арасында Рүстемова жедел жәрдем қызметіне бөлінетін жан басына шаққандағы тарифтің төмендігін; тіркелмеген тұрғындар үшін қаржыландырудың болмауын; халық санының едәуір өсуіне (оның ішінде жаңа «Нұра» ауданы есебінен) байланысты қызметкерлерге түсетін жүктеменің артуын; сондай-ақ жедел жәрдем станцияларының санитарлық көліктерінің тозуын (пайдалану мерзімі 4 жыл) атап өтті.

Тұрақты комиссияның төрағасы Аскар Смағұлов соңғы үш жылдың ішінде көлік сатып алу жағдайы жақсарғанын атап өтті. Мәслихат отырысына дайындық барысында iKOMEK109 орталығынан алынған деректерге сәйкес, шағымдардың саны былтырғы жылмен салыстырғанда үш есеге азайғанымен, әлі де бар. Сондықтан бұл бағытта жұмыс істеуді жалғастыру қажеттігін жеткізді.

Депутаттар бірқатар сұрақтар қойып, ұсыныстарын білдірді: бас жоспар аясында қосалқы станциялар құрылысы мәселесін, санитарлық көліктерді кезең-кезеңімен сатып алуды, мемлекеттік емханалар салуды, әр ауданға қосалқы станция орналастыруды, ал халық тығыз қоныстанған аймақтарда орналасу пункттерін ашуды талқылауды ұсынды. Сондай-ақ, денсаулық сақтау басқармасына орналасу пункттерін орналастырудың сызбасын әзірлеуді, онда автокөліктерге арналған тұрақ орындарының міндетті түрде қарастырылуын, соның ішінде бос тұрған алаңдарды пайдалануды тапсырды (Цирк ғимаратында 300-400 шаршы метр бос орын бар).