Депутаттар Tarlan Astana жүйесінің және елорданың көлік инфрақұрылымы нысандарының жұмысымен танысты

Tarlan Astana жүйесін бүгінде 3 миллионнан астам жолаушы пайдаланды, ал күн сайынғы жолаушылар ағыны шамамен 70 мың адамды құрайды. Бұл көрсеткіштер жаңа көлік түрінің елорда тұрғындары үшін сұранысқа ие болып, қаланың көлік инфрақұрылымының маңызды бөлігіне айналғанын көрсетеді.

Депутаттар елорда тұрғындарын қоғамдық көлікпен қамтамасыз ету мәселесіне арналған мониторинг аясында көлік инфрақұрылымы нысандарын аралап шықты.

Қоғамдық көліктің жылжымалы құрамымен танысып, Бірыңғай диспетчерлік орталықтың жұмысын көрдік. Мұнда тәулік бойы қоғамдық көлік қозғалысы басқарылып, қозғалыс кестесінің сақталуы бақылауға алынады және туындаған жағдайларға жедел әрекет ету қамтамасыз етіледі.

Сондай-ақ Tarlan Astana жеңіл рельсті көлік жүйесінің «Әуежай» станциясына барып, бірінші желімен жүріп өтті. Бағыттың ұзындығы 22,4 шақырымды құрайды және 18 станцияны қамтиды. Заманауи электр пойыздары 600-ден астам жолаушыны тасымалдауға арналған, ал қозғалыс толықтай ұшқышсыз автоматтандырылған режимде жүзеге асырылады. Заманауи басқару жүйелері, цифрлық технологиялар және қауіпсіздіктің көпдеңгейлі жүйесі жолаушыларға сенімді әрі жайлы қызмет көрсетуді қамтамасыз етеді.

Заманауи көлік инфрақұрылымын дамыту – Астананың тұрақты дамуының және қала тұрғындарының өмір сүру сапасын арттырудың маңызды бағыттарының бірі.