С. Сейфуллин атындағы Университетте заманауи цифрлық технологиялармен жабдықталған жаңа смарт-аудитория ашылды
С. Сейфуллин атындағы Қазақ агротехникалық зерттеу университетінде Астана қаласының Құрметті азаматы, Қазақстанның еңбек сіңірген құрылысшысы, техника ғылымдарының кандидаты, университеттің Құрметті профессоры, мемлекет және қоғам қайраткері Жанбыршы Есетұлы Нұркеновтің есімі берілген смарт-аудиторияның салтанатты ашылу рәсімі өтті.
Аудиторияның ашылуы құрылыс саласының, ғылымның, жоғары білім беру жүйесінің және елорда коммуналдық инфрақұрылымының дамуына зор үлес қосқан тұлғаға көрсетілген құрметтің белгісі болды.
Жанбыршы Есетұлы ұзақ жылдар бойы «Астана Су Арнасы» коммуналдық кәсіпорнын басқарды. Оның жетекшілігімен қаланың сумен жабдықтау және су бұру жүйелерін жаңғыртуға бағытталған маңызды жобалар жүзеге асырылды. Ұжым оны әрдайым әділ, парасатты басшы ретінде бағалап, қызметкерлердің әлеуметтік мәселелеріне ерекше көңіл бөлгенін атап өтті.
Жаңа аудитория болашақ мамандарды даярлауға, дәрістер, ғылыми кездесулер мен білім беру жобаларын өткізуге арналған заманауи білім беру алаңына айналады.
Салтанатты рәсімге университет басшылығы, мемлекеттік органдардың өкілдері, депутаттар, оқытушылар, студенттер, әріптестері мен Жанбыршы Есетұлы Нұркеновтің жақындары қатысып, оның жоғары кәсібилігін, көпжылдық адал еңбегін және елорда дамуына қосқан сүбелі үлесін ерекше атап өтті.
