Астана мәслихатының депутаттары елорданың тұрғын алаптарын дамытуды талқылады

Астана қаласының мәслихатында Табиғат Зейнұлқабденнің төрағалығымен сегізінші шақырылымдағы депутаттардың кезекті сессиясы өтті, оның барысында елорданың әлеуметтік-экономикалық дамуының бірқатар маңызды мәселелері қаралды. Тұрғын үй алаптарының инфрақұрылымын дамыту, көлік жүйесін жетілдіру және 2026-2028 жылдарға арналған қала бюджетіне өзгерістер енгізу мәселелеріне басты назар аударылды.

Күн тәртібіндегі басты мәселе қаланың тұрғын үй алаптарын дамыту мәселелері мен перспективаларын, соның ішінде сумен қамтамасыз етуді, кәріз жүйелерін және көлік инфрақұрылымын дамытуды талқылау болды. Осы мәселе бойынша Астана қаласы әкімінің орынбасары Еркін Өтебаев негізгі баяндама жасап, депутаттарды елорданың тұрғын алаптарында инженерлік және көлік инфрақұрылымын одан әрі дамыту бойынша жүргізіліп жатқан жұмыстар мен жоспарлар туралы хабардар етті. Ол бірқатар жобалар кезең-кезеңмен жүзеге асырылатынын, соның ішінде тұрғын алаптарды газдандыруды атап өтті.

Мәслихаттың құрылыс, экология, көлік және тұрғын үй-коммуналдық шаруашылық мәселелері жөніндегі тұрақты комиссиясы төрағасының орынбасары Ғабит Тәжімұратов қосымша баяндамашы болып, "АМАНАТ" партиясының жол картасы пункттерінің орындалу барысы туралы хабарлады. Ол бірқатар бағыттар бойынша ерекше назарды талап ететін орындалмау фактілерінің анықталғанын атап өтті.

Негізгі баяндаманы талқылау барысында депутаттар аяқталмаған нысандарға, соның ішінде Абайдың 150 жылдығы көшесіне және Тілендиев пен Бейсекова көшелерінің қиылысындағы көлік айрығына қатысты бірқатар сұрақтар қойды. Жақында жөндеуден өткен Көктал көшесі жүк көлігінің қарқынды жүруіне байланысты жөндеуді талап ететінін атап өтті.

Сессияда мәслихаттың құрылыс, экология, көлік және тұрғын үй-коммуналдық шаруашылық мәселелері жөніндегі тұрақты комиссиясының есебі тыңдалды. Бейіндік комиссия қызметінің қорытындысы туралы төраға Владислав Сергеев баяндады. Депутаттардың қолдауымен тұрақты субсидиялаудың арқасында жеке автопарктер жаңа автокөлік сатып алуға мүмкіндік алды, ал зейнеткерлер мен оқушылар тегін жол жүруді пайдаланады. Жол-көлік инфрақұрылымын дамыту, қоршаған ортаны қорғау, әлеуметтік нысандар салу салаларында қол жеткізілген нәтижелер депутаттар мен атқарушы билік өкілдерінің бірлескен қызметінің нәтижесі болып табылатыны ерекше атап өтілді.

Депутаттарға сондай-ақ "Астана қаласында жол жүрісін ұйымдастыру қағидаларын жол жүрісі қағидаларымен реттелмеген бөлігінде бекіту туралы", сондай-ақ "Көлік құралдарын жеткізгені (эвакуациялағаны) және оларды Астана қаласының коммуналдық меншігіндегі арнайы алаңдар мен тұрақтарда уақытша сақтағаны үшін төлемақы мөлшерін бекіту туралы" шешімдердің жобалары ұсынылды.

Депутаттар екі ұйымның бір қызметті қамтамасыз етуін болдырмау үшін жеке тұрақтарды ұйымдастыру жөніндегі қағидалар тармағына функцияларды бөлуге қатысты өзгерістер енгізуді, сондай-ақ ақылы тұрақтардың қызметі бойынша халықпен ақпараттық-түсіндіру жұмыстарын жүргізуді ұсынды. 

Депутаттар мәслихаттың "Астана қаласының 2026-2028 жылдарға арналған бюджеті туралы" шешіміне өзгерістер енгізу мәселесіне ерекше назар аударды. Экономика және бюджеттік жоспарлау басқармасының басшысы Айжан Түгелбаева қаланың кейбір шағын аудандарын инженерлік желілермен қамтамасыз ету үшін бағалы қағаздар шығару есебінен жергілікті бюджетті қосымша қаржыландыру туралы баяндады.

Сонымен қатар, сессияда кондоминиум объектісін басқаруға жарналардың ең аз мөлшерін бекіту, жер учаскелерін мемлекет мұқтажы үшін алып қоюға байланысты жер учаскелерін немесе өзге де жылжымайтын мүлікті иеліктен шығару туралы шарттардың жобаларын келісу мәселелері қаралды.

Сессия қорытындысы бойынша күн тәртібіндегі барлық мәселелер бойынша депутаттар тиісті шешімдер қабылдады.